الشاعر رضا البوشي
(مش عارفاني )
عارفاني
واللا الشعر الأبيض غطي ملامحي
وزي الخيل انا عجزت
كل مااشوفك برجع عيل
ماسك في ضفايرك ومتبت
انا مش عود كبريت محروق
إترمي ع الارض
ولا حتى شيطان عمره ماصلي الفرض
انا ضلك الي فاضلك لما ييجي الموت
انا زمنك اللي زي القطر عليكي يفوت
افتحي كراستك تلاقيني واقف ع السطر
انا ليل مخلوط في قلب نهار
انا بيت مفتوح شرق وغرب
انا قلب بيكره وبيعشق في نفس الوقت
صورتي متثبه ع الحيط
جوه مراياتك
انا حكيوه قديمه من حكاياتك
انا بطل كل روياتك
حتى وانتي بتبكي انا شايفك
منديلي الابيض اللي بيمسح دمعك
فاكراني واللا كبرتي وشيختي
فاكره لما كنا بنط الحبل
الضحكه على وشوشنا كانت مرسومه
ولا كنا بنخاف من وزرا ولاحتى حكومه
شراييني على شكل مربع
وانتي الاضلاع
وشويه ميه من نيلك كانت
تشفي الأوجاع
البحر لونه اتغير
والشط اتبخر زي الحلم
واتاخر حتى الفجر
والسمك خياشيمه بتتنفس سم
ونا ع المركبه وحدي
اصرخ والمقتول يسمع احزاني
مع اني ما بيني وبينك متر
مش شايفني
علشان عجزت مانتي كمان زي عجزتي
والا انتي لسه شباب ماتقولي يابت
مش عارفاني
ليست هناك تعليقات:
إرسال تعليق