طالع ع المريخ.
عبدالله رجب ابو عدنان
انا طالع ع المريخ
وها سيب خلاص الأرض
هناك مفيش فسيخ
والطول زي العرض
ولا كوسه ولا بطيخ
وما حد بيخلف وعد
ولا إشارة حمرا
ولا ضحكه صفره
ولا راجل مرور
لابس زعرور
ولا محروم ولا معذور
وناس بتحب بجد
ومفيش كدبه بيضه
واللي يكدب يتحبس ف اوضه
ولا وشم بلا تاتو بلا موضه
والغني زي الفقير
الغفير شبه الوزير
كومساري قاعد جنب أمير
والظلم فوق السحاب بيطير
من غير محاكم ولا عند
ولا زعيم يشيل صوره
ولا سفير يقعد ف المقصورة
احنا كده كده ما بنفهمش ف الكوره
والبداري زي المنصوره
وع المريخ البنت زي الولد
طالع ع المريخ من غير هدوم
البس الصدق والحب يدوم
وانسى ظلم اخواتي والهموم
واسيب مراتي تدعي وتلوم
واطلب من ربي العون و المدد
ف الرحله غلابه كتير بالشقا متحاوطين
وناس مالهاش فرص ف صفوف النابغين
سرقو كل حاجه حتى الأمل ف دنيا الملاعين
اللي عايز يكون هناك لازم يكون صادق وامين
ولو حد غلس عليك ما ترد
طالع ع المريخ..
عبدالله رجب ابوعدنان
ليست هناك تعليقات:
إرسال تعليق