من ديواني ( رسائل إلى ست الحسن )
( الرسالة الأولى ) . . .
إلى سِت الجمال و الحُسن إلى الحلوة اللي شغلاني
بنادي في الوجود كله و بَصرُخ انتي سامعاني ؟؟
شِياط في القلب من ريحته الجيران ضَجوا
و سكان الفؤاد طفشوا و عَزموا عَ السفر هَجوا
فلا غيرك في قلبي نزيل تعالي واسكنيه مفروش
خُديه ملكك أنا بطلت يبقي إيجار محبتهوش
دا فِـيه تكييف و كام أوضه ع البحور بتطل
وفيه بستان ملان بورود وفيه متحف ملان بنقوش
تاريخ قلبي أهو محفور صحيح حتلاقي جوا خدوش
متتخضيش جروح ماضي زمان عيشتُه فمتعديش
حسابك في الجروح حيضل فأحسن م الحساب ده نعيش
أنا عايزك تداوي العيوب ديه تحلي العقدة والتكتيف
حيرجع تاني قلب نضيف وقلب ظريف ودمه خفيف
متتكسفيش تنامي قدامه بلبس خفيف
لأنه قلب متربي أوي وعفيف
في يوم ما عيونك الحلوة تغنيله أكيد النبض حيسرَع
أكيد حتماً حيُغمى عليه أكيد الدمعة في عيونه
حتتنطط من الفرحة أكيد الدنيا حتولَع
و عيب قلبي يا ست الكل مش هـ أكدب مفيهش مطافي تلحقني
وليه ما انتي اللي حـ تطفي بقُربك نار بتحرقني
إذا عجبك فؤادي بجد فـ إوعي تقولي عنُه لحد
من الحُساد حبيبتي بدي ترتاحي هنا في قلبي
تنامي و تصحي بتغني و تتمني و تلقي للسؤال مِيت رد
أنا شخصيا هديتلك قلبي و مسافر هناك عندك تعالي خُديه
في قلبك يمكن أعيش الباقي من عمري وأموت أنا فيِه
وبسأل بس لو ترضي ؟ و راح أغزل حبال ودي و ألف قصيدة
للعاشقين كتبت حروفها لعيونك ما هو انتي في شِعري مقصودة
أنا لما أقول حبيبتي تعالي . تبقي إنتي
ولما أقول يا نور عيني ووحشاني . أكيد إنتي
و لما في الكلام بسرح . أكيد بسرح في ملهمتي
بلاش تقوليلي بسذاجة حبيبتك مين ؟ ما هو إنتي يابت معشوقتي
و ليلتي بتبقي زي الطين في غيبتك عَني صَدَّقتي ؟
جنانك هو مَن خَلى الحياة تِحلى بقيت بحسب غيابك عني بــ السنتي
بقيت مجنون أنا بيكي و بقيت بَرسِم علي الجدران عيونك خيل
لقيت طباشيري متلون بلهفة عليكي فرسمتك علي شيبتي
رجعت كطفل بتشاقى في وسط الحارة من طيبتي
و أوعي تقولي يا حبيبتي بقيت طفلك عشان خيبتي
إلي ذات الجمال بُصي بعين الرحمة لرسالتي !!!!!!
............................بقلمي عصام حسيني مدين
ليست هناك تعليقات:
إرسال تعليق