الشاعر / رضا البوشي
الشعر جاني
صاحب الصولجان والهيلمان
دق البيبان من فرشتي صحاني
وصحي بواقي الحياه فوق
خدود الممكنات ونا داني
الشعر زي الموت مالوش معاد
ياخدك من حارة لشارع
ويلف بلاد ومواني
جوه ضفايرة النونو فوق الضليلة
بشوف الدنيا جنان ونا واحد تاني
اوقات أضحك وياه زي البلياتشو
ويفوتني زي البحر بزوم في مكاني
بشكيلة من وجع الليام
وكأنه دكتور نفساني
وبقابلة في لوحه فنان
مرسوم جواها شخابيط تقاطيع مخفية
مولود جواها وشوش تانية
مليانه حياة وأغاني
وبشمه زي الورد اللي مفتح اللون الباهت
جوه غيطاني
وبطير وياه وبرفرف فوق الكون
وارجع طفل بيحبي عصفور واقف في مكاني
الشعر ياسادة بيصحي المقتول
وبيمسح الدمع الجاري فوق خد الأوطان
بيفتح كل الشرايين المسدودة
ويغير سير الريح والاعاصير
ويخلي بنت الصعلوك تتجوز بنت السلطان
الشعر ست وداية كل يوم مولود والتاني
ولا يعرف رجلية الموت
ولا يحبسه سجان متعافي
بحر وشط وموج وقوافي
معشوق الولهان والمشتاق والماشي والحافي
والشعر نور انار الكون طلعته
وبفضله تستقم كل المعاني
هو ساحر كل القلوب جميعها
هو مؤنسي في الوحشة الظلماء
الشعر خبط على بابي
ناداني صحاني
قمت كتبت وكأني البحتري في زماني
الشعر جاني
ليست هناك تعليقات:
إرسال تعليق