ياعم رمضان . تعى علق الزينة
هات الفانوس وياك . وإعملنا عجينة
نلزق ورق ع الحبل . وأنوار فى ليالينا
ومدفع كبير يضرب . و جاي يهنينا
وصوت الإمام رفعت . بأذانه ينادينا
نكسر صيام اليوم . بصلاة على نبينا
متجمعين والحب . والفرح وسطينا
ناكل ونتقرب ، و نود بعضينا
نفرح شوية كمان . بتليفزيون يسلينا
ييجي العشا . والكل وإخواتنا جنبينا
وصفوفنا جوه الجامع . تراويح تطول بينا
بيها بننسى هموم . وتزيد أمانينا
والنقشبندي يقول . ودعاه بيهدينا
وحوي يا وحوي كمان . أجمل غناوينا
ويا الكنافة نتوه . وخشاف . يدفينا
والورد من القرأن . ويارب راضينا
ساعتين وطبق الفول . مليان كدة طحينة
وزبادي على السحور . حاجة كدة خفيفة
ومكاوي ويا جاهين . والطبلة الأصيلة
دا مسحراتي ينادي . الصوم يا أهالينا
يلا نصلي الفجر . وكأنه ليلة القدر . يقبل دعاوينا
ييجي علينا بستر . حقق أمانينا
وياعم رمضان . تعى علق الزينة
نلقاكم بإذن الله تعالى عقب شهر رمضان المبارك
كل عام وحضراتكم بخير وسعادة وهناء رمضان كريم
أخوكم/ شاذلي محمد عبدالرحمن حسين
شادوليات
ليست هناك تعليقات:
إرسال تعليق