بيني وبينها شبرين
هما عمري
اللي ضاع ما بينا
احنا الاتنين
سمك لبن تمر هندي
انا ومن ضيع
في الأوهام عمره
واتسرق مابين
ايديا الاتنين
والشعر اهو ابيض
بعد السواد
و لون عنيا
اتغير حتي نن العين
والسنان اهي اتفرقت
والاتنين بقوا تلاتة
ومسكت العكاز
طب العافية راحت فين
والكرمشة سرحت في الوش
والبدر أصبح شين
عمر الشباب قصير قوي
ياللي كانوا
بيقولو لك الواد الزين
يازين شباب البلد
لسه محتفظ بأسمك
ولا بقيت محمدين
يادنيا ياللي
متغطي بيكي عريان
يامرايتي
ياللي بيني وبينك شبرين
اللي ضاع فيهم عمري
واتسرق فيهم شبابي
واحلي ايامي
ما دايم غير وجه الله
والعمل الزين
واخر كلامي وسلامي
علي طه الزين
بقلم
احمد محمود
من ديوان سكة العاشقين
ليست هناك تعليقات:
إرسال تعليق