كِمالة عدد
أوقات كتيرة جاني كان طالب المدد
ويقول عليا أنا كنت لُه دايماً سند
وأنا كنت عشقُه وكنت بيته وكنت ضله
وحِلمُه اللى إستنظَره في يوم يتوَلَد
بس إكتشفت بإنُه كان غرضُه الوصول
ولا عمرُه يعرف يعني إيه معنى الأصول
أنا كنت فاكرُه هيبقى عكس الخلق دول
بس إكتشفت أنا كنت لُه كِمالة عدد
أوقات كتيرة جاني كان طالب المدد
أوقات كتيرة قاللى وحكالي حكايات
وأنا من غبائي وطيبتي كنت بصدّقُه
وكنت دايماً يعني بسمع من سكات
وقولت حلم العمر جانبه هَحققُه
أتاري كل كلامه كان كدب وضلال
وكانت وعوده كلها وهم وخيال
وأكيد بقى يعني كده صدق اللي قال
صعب الخسيس يثبت في يوم على مبدأُه
بس إكتشف بإنه كان غرضُه الوصول
ولا عمره يعرف يعني إيه معنى الأصول
أنا كنت فاكره هيبقى عكس الخلق دول
بس إكتشفت أنا كنت لُه كِمالة عدد
أوقات كتيرة جاني كان طالب المدد
ويقول عليا أنا كنت له دايماً سند
بقلمي عبدالحميد وهبه
ليست هناك تعليقات:
إرسال تعليق