ليه الدموع
جوة العيون متحجره
ليه الآيدين
مصلوبه ليه متكبله
-- ليه اللسان
سدين عليه
-- وليه سجين جوة الحنك
هوا أحنا برضو مش بشر
ولا أسامي اتسجلت
بحبر أزرق عا الورق
ولا وجودنا فى الزمن ده
كان غلط
مش هاتفرق
بس عاملونا بشر
عمري مني بينسرق
عيني عينك بتسرق
ولسه سدين الحنك
واللسان مقفول عليه
جوة الحنك
عادي وطبيعي إني اتسرق
آيه الجديد
آيه العجيب
هوه النهاردة يا خلق بس آنا بتسرق
من سنين
قصدي عادي والطبيعي إني اتسرق
مين بيسرق
مين سرق
مش هاتفرق
بس عاملونا بشر
من لياقه نتمسك
وعشان أيدينا اتأيدت
كان سهل يومها ننسحب
ونتعلن وننضرب
من غير ما نعرف ليه
أو حتى ايه هوه السبب
مش مهم أحنا أيه
او حتى مين
الأهم وكان عشمنا
يوم يعاملونا بشر
. كتفونا
ف عز ليل البرد
درماغونا
وف طين المطر
نشكي مين
نقول لمين
هوه احنا عارفين كنا مين
ضمن البشر
ولا الحمير
مش هاتفرق
بس نتعامل بشر
. كل عين
اتحجرت فيها الدموع
هيه أمي .
هيه اختي
وهيه أبويا
كل إيد اتأيدت
هيه عمي .
هيه خالي .
هيه أخويا
لا بحر دم يهزكم
يا قلوب حجارة
لا عمر يرجع وعيكم
ديما سكاره
من أمتى بيحس الحجر
من أمتى كان عنده نظر
مافيش حجر يقدر يميز
لا بين بشر ولا بين بقر
ازاى هانتعامل بشر
. حر آيه
وهوه محبوس فى القفص
. حر آيه
وهوه ماشي وراه حرس
هوه في حر فى قفص
أو حر ماشي وراه حرس
لو حر عمره ما ينسحب
ولا عاالقفا يوم ينضرب
ولا يتربط
ويدرمغوه فى طين المطر
حر ايه
يا قلوب حجر
يا عيون مابطقش البشر
أحنا إللي جينا أكيد غلط
قصدي مواشي
ومش بشر
ولا يوم هانتعامل بشر
. هاتو الجديد من ظلمكم
ياللا فينا جرابوه
كهرابونا
اصليبونا
اعملو اللي تعملوه
اسمعونا
لحن غنوة لما نصرخ
ولما تسكت الآهات
الضرب فى الميت حرام
وف شرعكم بتحلالوه
احنا موتنا
شوفو غيرنا
فراجوهم عالجديد
فكروهم
رجعولهم
من جديد زمن العبيد
ولا يوم هانتعامل بشر ....
ليست هناك تعليقات:
إرسال تعليق