شعر/سعيد حمدي محمد
★★★★★
طول ما فيكى شباب متعافى
اوعاكى يا بلادى يوم تخافى
من اى طوفان يجيلك
دا انا فارس نيلك
قبل ما تنادى اجيلك
وان غدر الموج
يشقه سيف مجدافى
★★★★★
انا اصلى مراكبى
عشقك فى قلبى
كعشق القلع للصارى
متعلق دايما فى شغوله
وهواكى ينام فى طوله
زى الموال يصاحب ارغوله
فى ليل الصفا ويسافر
★★★★★
وبقالى سنين بعافر
غاليونى مايوم يتاخر
طول ما بغربل نهرك
لاجل ما احوش مهرك
واشبك هلب غرامى
فى شط عنيكى واتمدد
واشدد..فى حبال شبكى الذرد
حالف عمره مايتفرد
خايف تهرب منه الشهامه
وغزل اﻷصاله يتقرض
★★★★★
انا ماسك الدفه هنا يابا
ومالى قلوعى بنسيم الطيابه
ريس فى سفينة نوح
وهالملم معايا الغلابه
★★★★★
دايما عاشقين المهابره فى ربوعك
والعرق. بيولد جبابره فى طوعك
حالفين ما ينحنى ضهرك لطوفان
ولا تنزل ع الخد يوم دموعك
★★★★★
شعر "سعيد حمدى محمد
10/1/2023
ليست هناك تعليقات:
إرسال تعليق