ماكنش حلم بقلم السيد بدر

.ماكنش حلم ..

قلم السيد بدر 

ياما كتير على نفسك جيتي 

وياما عليا كتير داريتي 

ولجل تطمنيني 

كنتي طول وقتك معايا تضحكي 

ولما يعصرك الوجع 

تبان البسمه على وشك تسبلي عينكي

تحطي راسك عاالوساده 

أطفي ياللا النور هنام 

أنت ناسي إن عندك شغل بدرى 

.....

مابين صاحي وبين نايم 

أحس بالأهات أنين

أغطي راسي أقول ده حلم

أنام على الجنب اليمين 

يادوبني أغمض عنيا 

خلاص هاروح فى النوم أنام

أحس تاني أنين أهات

أنتفض أخاف أجيلك أقلقك 

عل نفسي اضحك أقول ده حلم

مانا كنت لما عليكي أشقر 

كنتي تحسي بخطوتي 

تكتمي أنين الأهات 

وتقولي مالك 

 سمى بالرحمن ونام

.....

وتقومي زى العاده بدرى 

ناسيه وجعك تشغليني بالفطار 

وتحسي إني حسألك 

كنتي بطريقتك تهربي 

وتقوليلي ياللا هايعدى الدوام

....

عرفت ده كله متأخر

وماكنش حلم وبحلمه

ده كان حقيقه

 يعنى مش حلم وخيال

ياصابره صبر جمال 

ليكي الجنه على صبرك

وليا رب من بعدك 

على بعادك يصبرني 

يقويني على ده الحال ..