مُتأسّفة
علشان ماقَدّرتش هواك
ولا كُنت ليك يوم مُنصفة
مُتأسّفة
وهبتني حُب وحنان
وقابلته أنا بهجر وجفا
مُتأسّفة
على كل كلمة قولتها ماسمعتهاش
على كل نظرة من عينيك مافهمتهاش
على كل غنوة كتبتها راحت بلاش
على شعوري وقتها لمّا إختفى
مُتأسّفة
شوف كام سنة
بتقدّم الحب الجميل
وتملّي كنت أرفض أنا
شوف كام سنة
والحب كان شئ مستحيل
ولا كنت بيه يوم مؤمنة
شوف كام سنة
وأنا كنت عايشة وقافلة على قلبي البيبان
ولا يوم حاولت أجرّب الشوق والحنان
كان في اعتقادي مافيش وفا ولا فيه أمان
طلع إعتقاد خاطئ وقِلة معرفة
مُتأسّفة
حاسة بندم
ع العمر اللي راح بلاش
والقلب فيه مات وإنعدم
حاسة بندم
ع القلب اللي حبّني
وقد إيه هوّة إتظلم
حاسة بندم
وحاسة فعلاً يعني بالذنب الكبير
وقد إيه جوايا كان مات الضمير
ع الفاضي عدّى من حياتي أكيد كتر
ماهو كل شخص في الحياة لُه فلسفة
متأسفة
بقلمي عبدالحميد وهبه
ليست هناك تعليقات:
إرسال تعليق