بالحيل خاسر
قال ابو اناصر انا بالامس قد امسيت ساهر
اكتــب الاشعـــار على كـل الامـــور الدنيويه
قلت في شعري بان الوضع ذا اصبح مغاير
ولتوى حضي بهذا الوضـــع مية مليون ليه
وليمن عايش على غاغه وان الحـــــكم فاتر
والمواطن مبتلي في حكـــم دوله فوضويه
وشعب من اقصاه الــى ادناه متحمل وصــابر
ياعسى بكـــره يزين الوضع وتحتل القضيه
وان نص الشعب في الغربه ومن ارضه مهاجر
لجل لقـــــمة عيش لولاده تعيش عيشه هنيه
وبعد نص الليل جــاني النوم لجفاني مباشـــر
قُــــلت انا بانام ويالهاجــــس يكفــــي لا هنيه
غُصت في نومي وفجئة فقت علــى صوت المواتر
ذي بجنب الـــــدار بتفحط واصـــــواته قويه
قمت فتحت الباب واذ بالطقم جا مليان عساكر
وان فـــــوق الدار طيـــاره بنـــوع المروحـيه
قالو انت اللي على الفيسبوك متفلسف وشاعر
قُلت نعم لكــــــن ايش الذنب ذي كلف سريه
كان من المفـــروض تجيبو فرد ونا باقول حاظر
صـــــدق انا مسكين وماخالف اوامــر سلطويه
قالو جينا حسب توجيهات تقلــينا الاوامــر
نسحبك مغصوب قُلت يارب ايش هاذي البليه
قالو شعرك انت ذي بالامس قد يجلب مخاطر
قُلــــت انا خطيت افكـــاري ولا توجد خطيه
حسب ماهو الوضع متدهور جاني هجس عابر
ماقصــدت انسان في ذاته ولاقصـــــدي الاذيه
طلعوني الطقم وقالو اسكت مش وقت المجابر
ودخلوني السجن دون اسباب وحجه منطقيه
للاسف في وقت خل الحر ساكت غير قادر
ان يقول الصدق في عصر الخنوع والعنجهيه
اصبح الصادق في ذالوقت هــو بالحيل خاسر
والكذب في الناس متصدر وعنده اولـــويه
ياالاه الكـــــون استغفرك يامـــن انت غافر
تغـفر لي الــــزلات وتهديني الى النهج السويه
قلم/ توفيق المجعشي
ليست هناك تعليقات:
إرسال تعليق