ماتفكّرش مالَكشي لازمة
زي قلم الألوان الأبيض
ما بيبقاش له شغلة مهمة
وكل الناس لوجوده بترفض
بكره مسيرك يوم هتقابل
حد يكون فاهم أو عاقل
يعرف يعني أكيد يوم قيمتك
وإنك شئ غالي ويستاهل
شخص تكون في حياته مُهم
مش كُمبارس لدور في الفيلم
شخص يكون بيحب الرسم
ع الورق الغامق والأسود
ماتفكّرش مالَكشي لازمة
زي قلم الألوان الأبيض
إوعاك تزعل يوم م الوحدة
جايز يعني تكونلك أفضل
وإوعاك مرة تخاف م الشِدة
جايز مكتوب بعدها توصل
ممكن يكون يعني إختلافك
هو السبب ورا إكتشافك
خلّاك تبان بشكل واضح
علشان كده فيه حد شافك
شاف الجمال وإتأمّلُه
شاف فيك حاجات بتكمّلُه
وإنك معاه فعلاً أكيد
مع بعض يعني هتوصلوا
بقلمي عبدالحميد وهبه
ليست هناك تعليقات:
إرسال تعليق