ماتقولّي إزاي يعني أثبتلك
وبأي طريقة إني بحبك
ما أنا أصلاً لسه ضعيف في الحب
لو كنت قريت كنت حاكيتلك
ماتقولّي إزاي ممكن أعبّر
عن حب أكيد عمّال يكبر
جوايا حنين يملا الدنيا
وغرام والله ما يتقدّر
وبحاول إني كتير دايماً
أحكيلَك عن حبي وأعلِن
ألاقيني أتراجع وأتردد
والخوف من قلبي بيتمّكن
عرّفني يدوب أول جملة
الناس في الحب بتنطقها
بعديها هقول دواوين كاملة
من أول كلمة أنا هبدأها
دواوين ومسيرها هتترجم
والكل يشوفها ويتعلّم
من بعد الجملة اللي حاكيتها
القلب إتجرأ وإتكلّم
من بعد الخوف فك حصاره
وخلاص أهو أعلن أسراره
ومعاك القلب خلاص قرر
هيكمّل وياك مشواره
بقلمي عبدالحميد وهبه
ليست هناك تعليقات:
إرسال تعليق