قوم يا ولدي شد حيلك
ماعتش وقت المرقعة
مش وقت نت والموبايل والسلاسل والسجاير
دا الخيبة قاعدة مربعة
ساعدني يابني وشيل معايا
الدنيا غالية مولعة
وكلم أختك تعقل شوية
هيافة يامه منوعة
بلاش بويات بلاش دوافر بلاش رموش
بلاش ملابس محزقة
الدنيا غالية والداخل ثابت
أخره يرافقنا ليوم أربعة
عيشوا يابني عيشة أبوكم
هدومة قديمة مرقعة
وكلم أمك كفايا نوم
تفوق وتصحى مع النجوم
تقوم تبطط فى العجين
تجيب حمية لفرن طين
مفيش حمل لفرن غاز ولا كيروسين
مفيش مهية تغطي شهري
كل يوم بيزيد فى قهري
خليك كتوم لاتقول سمك
ولا تجيبلي سيرة للحوم
والزيت بلاشه سكر بلاشه شاي مفيش
وعيش عفيف
بلاش نحلي بلاش نقلي ونبات خفيف
ولا أقولك بلاش تتعب أمك
وبناقصة حتى الرغيف
أصل خلاص الوضع بان
والكل عيعيش ع الرصيف
وأوعى تحلم يجي يوم تبقى عريس
عنجيب منين والشقة فين
تبني طوبة تشيل عقوبة
وتبقى للسجون وريث
اوعى يابني تفكر إن الذنب ذنبي
علمتكم هننتكم
ولحلمي طول عمري بنبني
حلم بحياة تكونوا فيها مبسوطين
بس قولي نجيب منين
شبعت دين شبعت طين
صبري نفذ ونقول يامين
ووصيتي ليك لو فى يوم جاني مرض
وظهر على جسمي عرض
بلاش تدور ع العلاج
مش هتلاقيه
ولو لقيته تجيب منين
بلاش تعافر بلاش تكابر
وإدفني حي فى المقابر
أصل ساعتها عتقول يامين
قوم ياولدي شد حيلك
ربي لك هو المعين
قلم/
نور الدين محمد(نبيل)
١٥/٤/٢٠٢٥
ليست هناك تعليقات:
إرسال تعليق