قبل ما تطفي الروح بقلم نشأت البسيوني

قبل ما تطفي الروح

بقلم/نشأت البسيوني 

في لحظة بتوصل فيها لنقطة ما حدش يعرفها غيرك نقطة بيكون فيها القلب محاصر من كل الجهات والأيام ماسكة في رقبتك والذكريات بتجر رجليك لورا والناس حواليك ماشية كأنها مش شايفة إنك بتغرق ولا سامعة الصوت اللي بيتحشر في صدرك وإنت بتحاول تتنفس وبتحاول تثبت إنك لسه موجود وإنك مهما اتكسرت لسه قايم على رجلك وتبص حواليك تلاقي الدنيا بتاخد 

منك أكتر ما بتديك والأحلام اللي كنت ماسكها بإيدك بتتفلت وحده ورا التانية وكأنك قدام سباق حافظه إنك مش جاهز ليه لكن بتجبرك تجري فيه وتجري وإنت متأكد إنك مش فاهم إنت بتجري ورا إيه ولا ليه ولا هتوصل لفين وتلاقي نفسك بتتعامل مع الوجع كأنه صاحب قديم عارف كل أسرارك ويزورك من غير ما يستأذن ويفضل قاعد جنبك لحد ما تتعود عليه لحد ما تبقى ما بتسألش هو 

إمتى هيمشي ما دام بقى جزء من خطواتك ومن كلامك ومن نظرتك اللي اتغيرت للناس وللحياة وللحاجات اللي كنت فاكرها هتفضل دايما معاك وتبدأ تسأل نفسك هو أنا اتغيرت ولا الدنيا هي اللي كشفت حقيقتها ولا الناس هي اللي بضهرها فهمتك معنى الوحدة ولا القلب هو اللي كبر واستوى على نار الخذلان لدرجة إنه ما بقاش يتأثر بنفس السرعة ولا ينكسر من نفس المكان وتفتكر 

اللي راح واللي ضاع والطرق اللي مشيتها برجلك وإنت مرغم واللي اتحملته علشان ناس ما يستاهلوش واللي اديته من عمرك لناس ما سألتش عليك لما وقعت وتقول لنفسك يمكن أنا اتعلمت بالطريقة الصعبة يمكن أنا دفعت كتير قوي علشان أفهم درس بسيط إن مش كل ضهر يتسند وإن مش كل كلمة تتصدق وإن مش كل باب مفتوح خير لكن وسط كل ده تلاقي فيك حاجه لسه منطفتش حاجه 

صغيرة بس قوية حاجة زي شرارة بتولع كل ما الدنيا تطفيك شرارة بتقولك لسه فيك مقاومة لسه فيك روح مش مستسلمة لسه فيك شيء ربنا حافظه مهما الظروف حاولت تكسره لسه فيك حاجه محتاجة تكمل وتثبت لنفسك قبل أي حد إنك ما اتخلقتش علشان تنهزم بالشكل ده وتفضل واقف رغم الإنكسار ثابت رغم التعب مايل رغم الحمل لكن مش واقع لأن جواك روح اتربت على الصبر وعلى 

الجدعنة وعلى إنك تشيل نفسك بنفسك مهما اتقل الطريق ومهما إتسدت السكة ومهما اتراكم الوجع فوق قلبك من غير ما حد يحس تكتشف إن اللي بيكسر الروح مش الألم اللي بيعدي لكن الصمت اللي بعده وإن اللي بيشيلك مش قوتك لكن إيمانك إن كل اللي اتاخد هيرجع وإن كل باب اتقفل هيتفتح وإن كل وجع اتزرع جواك هيطلع بكرة في صورة قوة ما حدش يقدر يهزها وتفهم إنك مش 

بتكمل لأنك قوي لكن لأنك اتعودت تقوم من غير ما حد يشيلك وتضحك من غير ما حد يفهم دموعك وتعيش من غير ما الحاجة اللي وجعتك توقف حياتك وإنك مهما اتألمت لسه فيك حياة لسه فيك روح ولسه قادر تقف قبل ما تطفي الروح