بسأل قلبي
اي اللي جرالي
بعد ما شفت عنيه السود
قاللي روح أسأل
غيري يا غالي
دانت مالكش معايا ردود
اكتر منك
مشغول بالي
حاسس إني معاه مولود
زيَّك كده
مش عارف مالي
نبضي ملخبط مش مزبوط
مرة يدق
يجيب ف العالي
مرة بحس معاه بهبوط
رُحت لروحي
عِدت سؤالي
يمكن رده معاها موجود
ردت روحي
سيبني ف حالي
أصله آسرني بأحلى خدود
رهن هواه أيام وليالي
والله أعلم امتى هاعود
أما العين نطقت وانا مالي
أصل جماله معدي حدود
انسى ابص لواحد تاني
لما هاموت وياكلني الدود
قلبي وعيني وروحي يا غالي
كله اليك يا حبيبي مشدود
عمر الحب ماكان بأماني
ولا تعرفله زمان وحدود
أصل العشق ده شئ رباني
أمر بييجي علينا مفروض
بيه موعود
بقلمي/ خالد جمال ١٠/١/٢٠٢٦
ليست هناك تعليقات:
إرسال تعليق