يا حبيبي بلاش تبعد عني
دانا دايماً قلبي عليك ملهوف
ماتسيبشي الناس تاخدك مني
والنبي يا حبيبي أعمل معروف
ماهو لما بتبعد وتسيبني
بتخض عليك وبموت م الخوف
بتاخدني ظنوني وبتجيبني
والثانية عليا تعدي ألوف
وبلاقي حنيني بيغلبني
والخوف والحيرة عليا ضيوف
ف معادنا أنا بفضل مستني
والروح بتلف عليك وتطوف
ماتقولشي فُلان جِه وأخّرني
أو باصّك غاب وشبعت وقوف
مش هرضى بأعذار يا شاغلني
ولا هقبل منك أي ظروف
خليك كده دايماً ملازمني
كما حرف العطف وراه معطوف
من غيرك ببقى غريب عني
لا لسان بيقول ولا عين بتشوف
كل اللي يشوفني بيسألني
مالك فيه إيه وشك مخطوف
وأنا هعمل إيه غصب عني
ما أنا دايماً قلبي عليك ملهوف
بقلمي/ خالد جمال ١٧/١/٢٠٢٦
ليست هناك تعليقات:
إرسال تعليق