تعبنا ياحنا من سحرهم
والشوق رمانا ف بحرهم
يا أهل الله حد يقولهم
هنموت من الغرقة
ده مهما شفنا معاه تعب
من بلطجة وأعمال شغب
لو كان هواه عجب العجب
والله ماهي فارقة
على خده خال في عنيه حَوَر
شلال جمال عالي الباور
صدق اللي قال زي القمر
في جماله صعب انك تلقى
مشيت وراه
خدني الهوى ونسيت حالي
بغازل هواه
بكلام غرام وبصوت عالي
دي قلبت بآه
واتجمعوا عليا الأهالي
ضربوني ميت علقة
يا جمالها لمسة ايديه
ويا محلاها الأنامل
يا أخوانا نظرة عنيه
دي سلاح دمار شامل
أربعة وواحد عليه
من كل عين شافت
في الرقة أستاذ وبيه
ف الحسن متكامل
دي خدود بارود وعيون طلقة
مشية حبيبي حاجه سنيوريه
مشية يا ناس ملكة
دا منين مانمشي باصين عليه
راصدينا في السكة
ايدي ف ايديه كده انجاچيه
عاملينلهم ربكة
جايبين تملي ف سيرتنا ليه
تتشكوا ميت شكة
هتقوللي اثبت دليلك إيه
بعرفها م الشرقة 😀
بقلمي/ خالد جمال ٩/٢/٢٠٢٦
ليست هناك تعليقات:
إرسال تعليق