............................
الله على ساعة العصاري
وانا قاعد في جرن أرضنا
بعيد في ذكريات الماضي
مع حالي لما كانت الحبايب
كلها موجودة معاية هنا
فاكر ياواد يا محمد أنته
ويوسف لما كنا نجي نلف
وندور حوالين أرضنا
ونسمع صوت العصافير
تزقزق بتغازل بغناها
سنابل طرحنا
طب فاكر لما كات الساقية
بدور جنبنا واحنا معاها ندور
غناوي زي الشدوف من فرحنا
واحنا بنروي بذور الخير
والضي المبدور بعرق العافية
علشان يطرح عيدانه سنابل
منه الخزين في البيوت
والباقي لصحاب النصيب
اللي ساكنين حينا
كنا يد واحده قوية
على بعض بيها نخاف
مكناش من أي حد نخاف
غير من ربنا
ولاحد كان يقدر لينا يقرب
ولا كانش حد بيهمنا
عشان كنا في الشدة وتد
عود واحد ولاحد كان يقدر
يجي علينا ولا حد يصدنا
وكله بالحب وتقوي الله
ايمانة عزنا
لف الزمان بينا ودار
لما الشيطان ضحك علينا كلنا
وروحنا عليه وخدنا من نفسنا
أهوالزمان اتغير واتبدل الحال
والفرع اللي كان واقف صلب
اهو مال ووقعنا في الفخ معاه
تهنا و تاهت معالمنا
وأصبح حالنا من سوء الي أسوء
لما الشيطان سكن مابينا
ولعب بينا فرقنا عن بعضنا
وشتت لمتنا وجمعنا
فيارب برحمتك انصرنا وقوينا
على شياطين أنفسنا
ورجعنا تاني إليك واصلح بالنا
بكل خير يارب يامعين
يصالح الأحوال
بقلم عبد المنعم مرعي
ليست هناك تعليقات:
إرسال تعليق