اوعى تنطق كلمة واحدة
اوعى تاني تقول بحبك
أو تهادي الروح بوردة
وفر الوردات لقلبك
وفر الدمعات لعينك
بكره تنزل سيل ف خدك
بكره تبكي عليك سنينك
لما تلقى الخوف مواعدك
عمري تاني ف يوم ما هرضى
إني روحي تعيش في قربك
وصلي عهد وماضي عدى
راح زمانه وولَّى عندك
صعب يتعاد النهاردة
صعب احن ف يوم لوعدك
مانت جرَّحت المودة
جيت ع الأحلام بعندك
صبت عشقي بطعنة حادة
جيت خنقت الشوق بيدك
كت جراحها ف قلبي مادة
من شظايا الخوف وصدك
عيني كت ع الحزن واخدة
تشكي نار الهجر بَعدك
ع الدموع شاهدة المخدة
ع الآهات والويل ف بُعدك
قلبي كان لك زي نسمة
وانت جيت ع الروح برعدك
كان لقلبك نور ف عتمة
كان في ليل الحزن سعدك
جاي تقوللي انسى اللي عدى
واللي فات كان غصب عنك
جاي بتتأسف بكلمة
ما الكلام بقى سهل عندك
دانت ف الويل والأسية
فقت فيك عقلك وسنك
قلبي ماببقاش ليك هفيه
واتعافيت من مس جِنَّك
دانت صحيت وعيي فيا
واستفدت بجد منك
بعد غدرك يابني بيا
قلبي عاش ف الشوق محنك
بقلمي/ خالد جمال ٢٤/٤/٢٠٢٦
ليست هناك تعليقات:
إرسال تعليق