وقت أمّا تحس إنك ضايع
والخير جواك زي الشر
من نص السكة تقوم راجع
مش عارف توصل للبر
دور على نفسك من تاني
وإن تاهت حاول تلاقيها
أحسن ما هتندم وتعاني
ولا عارف تفهم معانيها
دور على نفسك م التوهة
وإن ماتت من تاني إحييها
دور على نفسك واسمعني
ماتسيبهاش تايهة بقى وحايرة
ليه حاجب نفسك ليه يعني
قوم وأخرج بقى بره الدايرة
دى الدنيا أكيد بيك من غيرك
صدقني أكيد ماشية وسايرة
كام مرة حاولت إنك توصل
لٓكن م الخوف بتقوم واقف
مش عارف إيه اللي بيحصل
متكتّف يعني ومش شايف
بينك وما بين نفسك ساتر
وطريق ممنوع ومالوش آخر
بتحاول توصل لنهايته
بتحاول لٓكن مش قادر
ليه تسلّم للأمر الواقع
ليه دايماً شايفك مُتخاذل
في طريقك إمشي بقى وتابع
خلّيك طول عمرك مُتفائل
عيش يعني اللحظة بلحظتها
وسنين الفرح اللي نسيتها
لو عدّت جانبك لو صدفة
إوعاك من تاني تفوّتها
فكّر في حياتك وإحسبها
لحظات اليأس خلاص سيبها
خلّيها تروح على ناس تانية
تبعد وتشوف يعني نصيبها
إهرب م الهم ومن يأسك
ده مافيش حد غيرك هيحسك
علشان كده حاول من تاني
ترجع وتدوّر على نفسك
بقلمي عبدالحميد وهبه
ليست هناك تعليقات:
إرسال تعليق