ما تحزنشي هتحزن ليه
يا عم الحزن بيموِّت
ده مهما تعاني قول اوكيه
ومهما الدنيا فيك سوِّت
وهات للفرح أحلى بوكيه
هتلقى شموعه ليك ضوِّت
حذاري الماضي تبكي عليه
هتلقى رياحه فيك نوِّت
وعيش يومك بتضحك فيه
واوعى العمر لِيه تفوِّت
من الأحزان هتاخد ايه
غير النار اللي فيك شبِّت
ده لو تمشي في غيم لياليه
هيرهِب فيك وهيثبِّت
ولو ليلة هتخضع لِيه
هيمسك فيك وهيتبِّت
وعيش بكره بتحلم بيه
في قلبك فرحه بينبِّت
ده ربك وحده عالم بيه
وايه الدنيا ليك خبِّت
ولو حلمك سراب اطويه
وحاول تاني واستموِّت
ما تحزنشي ف لحظة عليه
ده حبة ميه وانكبِّت
وبختك لو معاند فيك
وساب ف الروح جراح دبِّت
وازن يأسك بصبر ماليك
هتلقى الكفة ليك طبِّت
وحب الحب واخلص ليه
تشوف الدنيا ليك حبِّت
ولو خان حب تاني عليه
هيلقى النار عليه هبِّت
صاحب فرحك وقرِّب لِيه
دي ياما البسمة ناس نجِّت
قاوم حزنك هتقضي عليه
وطفِّي ف ناره لو أجِّت
بقلمي/ خالد جمال ٢٥/٥/٢٠٢٦
ليست هناك تعليقات:
إرسال تعليق