ما تلفش وتدور
وتعيش كده ف الدور
إني اصبر على عشقك,
مابقاش ف المقدور
لساك جاي تمثل
على قلبي وتتوسل
إني ارجع لزمانك
واعيشلك مأسور
ما بلاش تتعب نفسك
علشان تشبع نقصك
وتبرر لخيانتك
وتقوللي انا معذور
ماهو غدرك بقى واضح
على قلبك زيف ناضح
والماسك اللي ف و شك
بقى يفضح مستور
كان قلبي بيخلصلك
والروح دايبة ف وصلك
وجزائي في اخلاصي
كان دمي المهدور
كان ردي معاك صدي
ووقفت كتير ضدي
وأنا قولت اللي عشقته
كان لولي ومبدور
بشهدلك بأمانتك
على صدقك ف خيانتك
على نبلك وشهامتك
برفعلك قبعتي
وبقولك مشكور
روح يابني وهملني
دانا غدرك ململني
على جرحي الله يعيني
على قلبي المقهور
كان قلبي مطمني
على عشقك مآمني
كان شايلك ف النني
كان أقرب ليك مني
قدرت اللي وفالك
بغرام كدب وزور
ده مسيرك هتآسي
ما هتلقى اللي يواسي
وهتشرب من كاسي
وتدوق من احساسي
والدايرة اللي طوتني
على قلبك هتدور
مشكور
بقلمي/ خالد جمال ٤/٥/٢٠٢٦
ليست هناك تعليقات:
إرسال تعليق