راجع يبكي بدمع العين
وبيحلفلي يمين واتنين
يترجاني اني انسى سنين
عاشها القلب في ويل وأنين
وعايزني أصفاله وألين
واقوله على خداعه آمين
لأ بصراحة بجد أمين
جاي تعملهم ياض على مين
راجع لسه وجايلك عين
جبت بجاحتك ديه منين
دانت كلامك كدب وشين
اضحك بيه على ناس تانيين
بعد ما مات في القلب حنين
راجع لسه عليه هتمثل
نفسي تبطل بكا ونويح
تسلك مرة وتبقى صريح
دمعك زي دموع تماسيح
صوتك سامعه لأفعى فَحيح
جاي بتقوللي ندمت صحيح
طب ع الويل ولا التباريح
اللي في روحي كانت بتطيح
ولا على القلب اللي جريح
سبته يضيع في مهب الريح
رهن الحزن أسير تنويح
خدته بيبرُق سبته صفيح
ولا على العقل اللي طريح
اللي ف همك كان بيزيح
كان بيك طاير سبته كسيح
بعد ما قلبي ارتاح ف ضريح
بعد وفاته بهوى كان ريح
جاي برفاته كمان هتمثل
بقلمي/ خالد جمال ١٦/٥/٢٠٢٦
ليست هناك تعليقات:
إرسال تعليق