اوعى تنسى اني المرسى
مهما تغيب راح ترجعلي
ازاي قدرت ف يوم تأسى
ولا حاجه قدرت تشفعلي
اديتلك اكتر من فرصة
ده كله من خيبتي وجهلى
بنده عليك وشاريك لسه
ليه تملي رافض تسمعلي
ده عشان عنيك سبت الدنيا
بعت الصحاب ونسيت أهلي
دي الروح معاك بهواك حاسّه
طب ليه مُصر تلوعني
كت دايبة فيك كده من همسة
وازاي قدرت تودعني
تستنى من عطفك لمسة
بس انت غدرك روعني
كت تحكي عنك للنجمة
تتمنى لو بيك تجمعني
بتخاف عليك لو م النسمة
واسيت وقلبك ليه باعني
كل اما أقول هتحن ف يوم
تضحك عليا وتخدعني
ف وعود كتير ولا ليها لزوم
عمال تعيد وتصدعني
عارفك هترجع يوم وتقول
انسي الألم وسنين الويل
ساعتها هجري عليك على طول
اخدك في حضني ودموعي سيل
في ثواني هنسى اللي حصل لي
زي النهار ما بيمحي الليل
ولا ثانية غبت ف يوم عني
مين ده اللي قال كان ليلي طويل
وهغني ليك وهتسمعني
وانشد ف وصف الهوى مواويل
ولا عمري لحظة عليك هأسى
اوعى تنسى اني المرسى
بقلمي/ خالد جمال ٨/٥/٢٠٢٦
ليست هناك تعليقات:
إرسال تعليق