استنى حبيبي بلاش تمشي
دي الخيرة أكيد ف التأخيرة
ف غيابك رمشي مابينامشي
والروح لهواك عايشة أسيرة
ليه تملي الساعة معاك تجري
وإن غبت بتاخد تعسيلة
على حظي تقوم كده من بدري
تنسى الفصلان والتشخيرة
إن غبت حبيبي ف يوم عني
بلقى الأحزان فيا كتيرة
وبلاقي عليك قلبي سألني
والروح مالهاش بعدك سيرة
دانا مهما اسمعلك ماشبعشي
من همس هواك لو كام ليلة
وكلامي معاك بلقاه يشفي
ويداوي ف روح عايشة عليلة
والحسن معاك مابيفرقشي
ف الضحكة جميل والتكشيرة
وياك مطمن مابخافشي
والدنيا معاك رايقة جميلة
دانا طير ولقيت ف هواك عشي
والأهل كمان ويا العيلة
لو يوم هتجيني بلاش تمشي
أنا بترجاك وماليش حيلة
وان لازم ولابد هتمشي
فياريت ترحمني من الحيرة
يا تاخدني معاك وقت ماتمشي
يا تحرر روح عايشة أسيرة
بقلمي/ خالد جمال ٦/٦/٢٠٢٦
ليست هناك تعليقات:
إرسال تعليق