مشيتها سحر وده تمامها
ومفيش يا ناس حد هاممها
مش عاملة لينا أي حساب
ولا حد فينا مالي عينها
سايقة الدلال مستهبلة
هيه عشان ما بكحل عين
وبورد مبدور ع الخدين
ربك كارمها
كل يوم لينا مشكلة
ولا عشان نني العيون
احترت فيه ما لقيتله لون
والسحر ساكن ف الجفون
هتسيب خلاص المسألة
ويجوز عشان الشعر ليل
مفرود يا ناس على ضهرها
وكأنه سيل
وكمان ليه قُصّة
هيه الحكاية مستحملة
قال يعني ناقصة
ولا عشان أجمل حصان
من شعرها عاملاله ديل
تعمل خلاص مش من هنا
ولا عشان عودها اللي جامد
ده أحلى عود
غزال يا ناس هربان وشارد
تندهله عود
لو مشيته
محتاجة طبلة والوقفة عود
برضه الامور ما توصلشي لكده
حاولت أحل المشكلة
نديت وقلت بأعلى صوت
أنت ياله
ماتلم نفسك ياض شوية
بصِّت عليا بطرف عينها
وكأنه طار بيني وبينها
طار قديم من كام سنة
زلزال جمالها جابلي الشاويش
جبت لورا وماهمنيش
قلتلها لأ ماتبصليش
بنده لغيرك حد تاني
ماقصدتكيش
كان حد فايت من هنا
كل اللي قلته قليل عليها
كان بجد يا ناس شوية
بصيت لقيت الدنيا ديه
باللي فيها لفه بيا
كان خلاص هيسيبني وعيي
وهيغمن عليا
غلبني السكوت
وخلاص يا ناس من جمالها
بفرفر هموت
نظرة عيوني بتقول الحقوني
شوفوا حد غيري يحل أم المشكلة
بقلمي/ خالد جمال ٧/٧/٢٠٢٦
ليست هناك تعليقات:
إرسال تعليق