على خفقات المسام النازفه
عشقا سرمديا للسلافات الملاح
مزج أخير.. جلال سوداني
سودانية وخيرك داني
كلك هيبة ونبض إنساني
والله واحشاني بجد واحشاني
يا البتقدري ظرفي وتكرمي لشاني
يا تمام كيفي وجلاء أحزاني
وإنتي بعيدة.. بعيييدااا
هنآك ما بين خفقك ودمعك
وما ناسياني وصابرة عشاني
آه من نبلك يا شايقاني
حافظه لعرضك ومقاسمة لسمحك
يا مسامحاني بكل هفواتي
وبين الناس بتعظمي شاني
وأنا عطشان سارح هيمان
ما بين حضنك وضفاف نخلك
وفي ذكراكي جرحي مبتق
القبلي الشايل ورذاذو يطق طق
وصهوات خيلو ليك تستشرق
يا معطونة بحن الحن
حين ما تغرب ووقتين ما تشرق
وجداني النازف ودمعي الهادر
ليك مجدول حريرة جرتق
والله واحشاني يا نشوق
روحي وسناها الداني
وليك شايقاني الضحكة الصادحة
اللا مصنوعة ولاها فرية
وفارقه عليا عيون وطني
وأصدق إلفة ومشاعر حية
رحيق الأنس الما عاريه
سلاف لحظاتنا الوجدانية
وقلوة بن ساويها بنية
سميرا ضحوكا وماها قسية
عدلت بيها مزاج همساتنا
الحلوة مع الضحوية
مين الداب في بريق السكر
وأسرو رحيق الإنسانية
ثغر الفنجان الخدران وموله
ولا حرير إيديها العزيزة عليا
خلانا نعيش كهارب
السحر الناطق بالوجدانية
فتق إحساسنا الفرهد وبوح
فضح أحلامنا الوردية
يا سمرية وخيرك داني
عذرا لصهيلي وصليل خفقاني
بريدك جد والأنثى سكون ووطن
وأنتي خير أوطاني
ضفاف النيل والنخل الشامخ
قماريهو تقوقي مع الدغشية
والله واحشاني وفارقها عليا
يا آسراني ومالكه كياني
يا عشق مقيم برفيف وجداني
يا كون من فطنة وحشمة
يا أروع وأحلى سمار سوداني
الحبوب الشبشاوي
(بشير التوم إبراهيم)
الخرطوم السودان🇸🇩
#الشبشاوي
ليست هناك تعليقات:
إرسال تعليق