قلبي آسى وداب خلاص
مرة أزمة ومرة نوبة
كل مرة أقول خلاص
قلبي تاب من ديه نوبة
أرجع انسى وأقول خلاص
يجرى ايه لو زيدنا نوبة
مش لاقيلي معاه خلاص
مش عارف للعشق توبة
مهما خطى عليك وداس
ده ف أساه مطوية طيبة
لو سقاك المر كاس
مُرُّه شهد ف ايد حبيبة
لو هيكسر فيك مِراس
كسره جبر وضعفه هيبة
لو ف قربك عاث وجاس
لو بعِدت يرد غيبة
لو شبابك لاجله راح
لو ماجاش الروح ف شيبة
لو جنيت منه الجراح
ايد بتجرح ايد طبيبة
أصله يابني ياقوت وماس
يضوي فرحه ف روح كئيبة
طب قولولي ازاي يا ناس
أسلى عنه واقوله توبة
أصله جوه الروح أساس
مبني فينا طوبة طوبة
توبة
بقلمي/ خالد جمال ١٧/٨/٢٠٢٦
ليست هناك تعليقات:
إرسال تعليق