بنشتري كل القديم
كراكيب سنين
كل اللي عدى وعلينا فات
أخلاق زمان أجدع جيران
أيام جميلة بقوا ذكريات
بنشتري برضه الشهامة
ونخوة رافعة للحق هامة
بنشتري حتى الملامة
بعتاب بيبني مش بيأذي
ومايقلِّش للناس كرامة
قلوب بتفرح مش بتجرح
م الفرحه تلقى عيونها باكية
بنشتري لو نفس راضية
تسعى بحلال على رزقها
مش خلق فاضية
قلوب تخاف على بعضها
مش ناس معادية
دايما بتحمد ربها
مش لاعنة شاكية
بنشتري وبأعلى سعر
صدق الكلام والاحترام
وقلوب بتوفي
مش خلق هايفة
م الحق خايفة
أو للحقيقه ليل نهار
عمّالة تخفي
ايدين تئيد شمعة ف ظلام
مش ايد بتطفي
بنشتري ،،،
ناس كلامها يكون ف ضهرك
زي وشك
ومحال تغش
مش عشان المصلحة
تلاقيه ينافقك أو يغشك
وبألف وش
وعودها صادقة
وكلامها فعل
مش ناس بتخلف وعدها
ومعاك تقل
قلوب تكفَّر بعضها
مليانة غل
اللي في ضميرها وقلبها
بينطقه
على طول لسانها
بيبان كمان على وشها
بنصدقه
وعيونها حاكية
بنشتري أيام زمان وأحلى ذكرى
بيكيا
بقلمي/ خالد جمال ١١/٨/٢٠٢٦
ليست هناك تعليقات:
إرسال تعليق