ضحكة ايه اللي اتشدوا ليها
دانتي سابقة بضحكتك
أحلى ضحكة اتغنوا بيها
تايهة ضايعة في سكتك
مانتي لازم تمحي فيها
لما تيجي في حتتك
دانتي لما بتضحكيها
بلقى قلبي ف مهجتك
بلقى روحي دايبة فيها
من جمالها ورقتك
صوت ملايكة بيسري فيها
جاي صداه من جنتك
حسن سلم أمره ليها
سحر ساكن شفتك
اضحكيها وعلِّي فيها
اغمريني بفرحتك
داوي جرحك كله بيها
لو همومي بكِّتك
مهما لاموا الناس عليها
لو عذولك بكتك
اوعي ثانية تبطليها
اوعي حد يسكتك
انسي خوفك بين ايديها
انسي قلقك ربكتك
دانتي خدت القلب بيها
يوم ما رنت ضحكتك
نن عيني اتشد ليها
روحي قالت عشقتك
شفت حلم العمر فيها
شفت وعدي في سكتك
نص ديني وتم بيها
روحي عمرك شاركتك
من دهبها المطوي فيها
اشتريتلك شبكتك
ضحكتك
بقلمي/ خالد جمال ٧/٨/٢٠٢٦
ليست هناك تعليقات:
إرسال تعليق