ياللي دايماً فيه بفكر
نظرة منه بتوه وبسكر
ياللي كل ما فيك مسكر
قلبي يابني عليك مسكر
جيت صفيتلي زمان معكَّر
خان وعودي معاه وتنَكَّر
قلَّ مني وياما حقَّر
جيت وهبت الروح كيان
ياللي عشقك جه وحرر
عمري م الأسر اللي مرر
بعد قلبي ما كان مفكر
إن حزنه عليه مقرر
كان نصيبه عذاب مش اكتر
ناس تخونه وناس تحوَّر
جيت خطفت القلب يا أسمر
بعد قلبي ما عاش يدوَّر
حد صافي بقلب اخضر
يروي جدب الروح يخضر
كان هواك وعدي المقدر
كان لي فرحة وفيض حنان
قبلك عشت زمان ف صراع
كان للمُر ف روحي جرَّاع
كسر الخوف للقلب شراع
شل الحزن في ايد ودراع
جف الشِعر في عين ويراع
جوه الروح قتل الابداع
قلت معاك للشكوى وداع
خدت زماني انا بالأحضان
ياللي معاك ضحكتلي سنيني
وسقيتلي الورد ف بساتيني
ياللي ف بحر العشق راميني
قلبك من نواته حاميني
شيلت الدمعة يا واد من عيني
جيت بهواك ومحيتلي أنيني
عمري ما هنسى الشوق وحنيني
وعدي معاك راح اشيله ف عيني
ياللي هواك مسطور في جبيني
ومعاك حس القلب أمان
زِحت زمان بالعتمة ماليني
ومعاك شفته أنا طيف ألوان
بقلمي / خالد جمال ٥/٩/٢٠٢٦
ليست هناك تعليقات:
إرسال تعليق