تسع شهور
فكرتِ حالك بالخلافة
خلّصت
تاري هيدي البداية
وغمار الحياة بعد ما
خضت
ربيت وتعبت ولقيت
وبالعقل حويت
دروب القلوب مشيتي
ومسكت الكون براحتيك
وانطلقتي
البشرية مثل ما حبيت
سيّرت
هيك مسكتِ زمام الامور
وبلشتي
شو بدي سمّيكي
يا ست الكون
يلي بالصبر توصّفت
وبهل حياة تمرمرت
وما خبرت
الا الحب يلي عليه سهرت
والدنيا بطلّتك سحرت
الحب ما بيعيش بدونك
بالشوق حنانك جسّدو
وطلتك البهية يا أم الحنية بتساوي كل البشرية
انت ميزان الحياة
بتختل بدونك التوازنات ومنصير عايشين هل عمر
بدون أي معادلات
والعاطفة بتودع بيوتنا الأبية
والنفوس بتصير حجار قوية خالية من العاطفة ومن الشفافية
وهيك العمر بيمضي
ما الو لا طعم ولا شهية
بتعرفي مين انت يا ست الكون؟
انت الحنان والحنية
انت يا أمي الهنية
حملت بقلبك كل الصعاب
تتداوي جروحنا المخفية
وترمّمي نفوسنا من نفسك الابية
نحنا مفكرين الحياة هي تضحية
تاري انت ضحيت بنفسك حتى نعيش عيشة هنية
وينك اليوم يا امي الحنونة رحتي وتركتي بقلبي قطبه مخفية
نار الحنية عم تشعل كل يوم شوية
قايدة بقلبي مثل المي المغلية
بصبّر روحي وبقول هيدا قضاء رب العالمين
ونعم بالله يا امي
بس الحياة بدونك عتمة
عم حاول اتذكر كيف
ضويت ايديك شموع
وعلمتيني امشي هل الدروب اول مشية
ومشيت ع الهدى بين ايديك وهلق ع خطاك
ماشية شويه شويه
وبكل خطوة بتذكرك
وانا واثقة انو دربك هو يلي لح يوصلني
ولو وصلت مأخرة شوية.
* * *
أهدي قصيدتي الى ست الكون والدتي المرحومة عفاف عبد المجيد الحلواني واطلب منها الرضى،
يا رضى الله ورضى الوالدين!
كل عام وجميع الامهات بألف خير.
بقلمي
ريما خالد حلواني
ليست هناك تعليقات:
إرسال تعليق