حلم بايت
ديواني الثالث
سنوات الجفاف والحب
محمد ياسين
الحكاية مش حكاية حلم بايت
الحكاية مش حكاية عمر فايت
الحكاية انا كل ماكبر
حبي ليكي وشوقي يكبر
والدموع في عيوني تكتر
وابقى فيكي بجد دايب
ياللي ساكنة ف قلبي عافية
نظرتك بالحب دافية
باعشقك والنية صافية
سهمك انتي ف قلبي صايب
السنين بتلف بينا
لسه عايشة الفرحة فينا
لسه مش راسيين في مينا
نبض جوا القلب غايب
شاب حب ف قلب شابة
قلبي رفرف حبة حبة
زدنا ويا الشوق محبة
والوجع في القلب طايب
ياللي حبك جوا مني
شد روحي غصب عني
واما جيتي خلفتي ظني
كنت طايش كنت خايب
ليه قلبتي الحب قسوة
ليه صبحتي ف لحظة نزوة
والحياة في عنيكي هفوة
يعني انا اللي طلعت عايب
مش مجرد شيء خيالي
دانتي عايشة ف كل بالي
ياللي حالك هوا حالي
ليه مايبقاش ليا نايب
خلي بالك عندي كلمة
لسه شاب وكلي همة
لما احب يكون بذمة
واللا قلتي عجوز وشايب
نفسي بس اشرح ظروفي
اسمعيني وحسي شوفي
حبي فيا ولمي خوفي
دا الأمل يعمل عجايب
قلبي حر جميل ورايق
عشت كل حياتي فايق
في القلق مش بابقا طايق
قلبي مش حمل المصايب
طب ماتيجي نعيش نجرب
من هموم الدنيا نهرب
نسقي كاس الشوق ونشرب
نملا بالحب الزكايب
الحكاية انا كل مافرح
فرح قلبي يتوه ويسرح
والفراق في القلب يجرح
في الأخير نفضل حبايب
ليست هناك تعليقات:
إرسال تعليق