مافيش حاجة
تحياتي محمد ياسين
نقول ازاي مافيش حاجة
وجوا القلب ميت حاجة
مسائل لسه محتاجة
وياما الحاجة حواجة
ولو فكرنا نتكلم
ونسأل مرة عن حاجة
تلاقي الدنيا حوالينا
سكوت خالص
كأنه مافيش ولا حاجة
فيه ناس بتعيش
عشان حاجة
وناس بتموت على الحاجة
وناس الحاجة تقتلهم
وفي الآخر ده كله كلام
مالوش حاجة
سراب في طريق مالوش آخر
ودقة قلب تتاخر
وناس جايبة من الآخر
عشان حاجة توصل بعدها
لحاجة
تعيش وتموت ماهيش فارقة
حياتك ضايعة في الفرقة
بتحلم ان يوم تلقى
قصادك بالامل حاجة
نسيت حلمك وتهت بعيد
وصورتك في الوشوش تجاعيد
نسيت شكل الهدوم في العيد
عشان ماتقولش على حاجة
وحاجة تجيب في مية حاجة
وهيا الدنيا محتاجة
بسيطة وسهلة صدقني
ومش مستاهلة ولا حاجة
يا عاشقانا وكارهانا
وسايبانا مع الحاجة
يا زعلانة وفرحانة
وواخدانا لمفيش حاجة
بذمتكوا
محدش فيكوا
حس ف مرة بالحاجة
رسم حلمه ف عيون بكره
عشان يلقى يدوب حاجة
محدش فيكوا عاش يحلم
وفي الآخر رجع والحلم قدامه
ولا حاجة
لكن محلولة مش مستاهلة
بكره مسيرها تتعدل
مافيش حاجة
وكله بجد لاجل يعيش
ويلقى لنفسه لقمة عيش
بدل مانموت على الفاضي
بدون حاجة
ماتستفسرش عن حاجة
وتسأل لو حصل حاجة
لأنه مافيش ولا حاجة
تخلي الناس تقول حاجة
وتستغرب وتتبهدل
عشان تطلب في يوم حاجة
أمانة عليكوا
لو فاهمين ولو حاسين
ولو شايفين مافيش حاجة
قولولي يا ناس
عشان ماسألش عن بكره
وماستناش في يوم حاجة
بدل ماتعب والف وادور
وييجي عليه مره الدور
وافكر إنه فيه حاجة
ألاقي الصدمة واخداني
في بحر التوهة رمياني
ويعملوهالي ميت حاجة
وصاحب نفسه يتصاحب
وشيخ منصر مالوش صاحب
عملها سويقة واتصاحب
وفي الآخر
ماخدش معاه ولا حاجة
فيه ناس عايشة ومش راضية
وناس عايشة بعقول فاضية
وضربة حظ لو قاضية
هاتعدل كل يوم حاجة
ولاجل العيشة تتعدل
وجو الضلمة يتبدل
بدل ماتعيشها متقندل
لا بد تظبط الحاجة
يا خايف لسه من بكره
وفيه جواك ميتين فكره
هاتفضل برضه للذكرى
وتنسى انك في يوم حاجة
ليست هناك تعليقات:
إرسال تعليق