لا لا تْغمًس
في لِماشي ديالك
ؤ على حق الغير...
تْكَيِس
شوية ديال العفة
ؤ ب لحلال عمر لقفة
زرع لخير ؤ غرس
دنيا لعابة ركالة
تعطيك ليوم ؤ لغد تْقبًح لك الحالة
زواق يطير ؤ لفش
نقش...
قلبك بالصفا فالقنعة تاج
وخا تغرق تجمع تبقى ناقص محتاج
فالسحت طريقو كحلة ؤ يأس
ؤ ذيك لكرش
سولها واش شبعت
ؤ ب دخل دخل واش قنعت
تصيبك العلة غدا ؤتفش
فشور لا تغمًس
في حق لكادح ؤ لفقير
لِ راس مالو خبز فطير ؤ حصير
حرام أصاحبي تكَدي في قلبو الغمة
تكحل عيشتو ؤ أنت تْفركس
لمزوق ب ديال ناس عريان
ؤ ل داه زعطوط يديوه لْبيران
تضربو لجايحة ؤ يتكمش
من رزق لعباد زعما زيتني لحالة
ؤ ف دواخلك شاعلة شعالة
عايش نادم ؤ مكرفس
فشور ولعن الخناس
طمع دنيا ظن ؤ وسواس
شحال من واحد ف قاعها جرفاتو
ها ل عواج ؤ ها ل تهرس
ب لقليلل عيش سبع
بركة الله صُولو لِ تنفع
لا تكون مخلوق مْجَوْعِف...
تَخلقْ باش يفترس
ف نقص فيخرات أصاحب
واخا ساهلة الرقيب وحدو يحاسب
تسلح بالقنعة ...
ذوق طعم لحلال وتنفس
يتصلحو أهلك ؤ ولادك
الله في صلاحهم يبارك
يعوضك بهم ؤ يفلح لغرس
فلا تغمًس
في لماشي ديالك
صون عزة خوك ...
ؤ على حقو تكيس
*** الزجال والشاعر: احمد الكندودي ***المغرب ***
ليست هناك تعليقات:
إرسال تعليق