لا انا اهبل
ولا درويش
انا شاعر بفت العيش
وبكتب شعري من دمي
وروحي لسه محبوسه
وقلبي جوا بيغني
باموت بين لحظه والتانيه
في دنيا م الأمل عاميه
واشوف الفرح بيعدي
بيخطف ورد من خدي
وياخد حلمي ويسافر
لا انا اهبل ولا درويش
انا كل اللي بحلم به
اعدي واعيش
ولا عندي اماني وغيط
ولا حابب اكون غير خيط
يلم الاهل والصحبه
في قعده زي ماكنا
ونضحك والقلوب صافيه
نمد ايدينا ونشبك
نحس بنبض بعضينا
تعدي الفرحه وتسلم
على قلوبنا وتسقينا
نغني كل يوم غنوه
ونشبكها في أمانينا
يعدي الصبح فوق كفه
حكاوي من حكاوينا
بدون ورنيش
لا انا اهبل ولا درويش
انا كل اللي بحلم به
اعدي واعيش
والاقي مره في جناحي
منبت ريش ..................
اشرف الشناوي
شاعر عاميه
البرامون
المنصوره
ليست هناك تعليقات:
إرسال تعليق