يا راميني ف بحر عنيك يا أسمر
بشرب م السحر واتوه وأسكر
يا ساقيني هواك شهد مكرر
وليلاتي أنا ويا الشوق بسهر
ماتقوللي واخدني هواك على فين
يا كاويني بنار قايدة جفونك
وطاويني بعقلك وجنونك
دانا هفضل على طول مفتونك
وأسير لرموشك وعيونك
للورد النعسان ع الخدين
ماعرفشي أنا ايه اللي جرالي
أول ما عنيك شغلت بالي
اتبدل واتغير حالي
زي الطير صادح ف العالي
طاير ف سماك من غير جناحين
كان قلبي غريب في الدنيا دي
كان كل الكون سد قصادي
بس معاك هلت أعيادي
وهواك بقى زادي وزوادي
وبقينا أسعد قلبين وروحين
دانا كل منايا تفهّمني
إزاي كده خدت الروح مني
وسكنت ف عيني وف النني
وبقيت أنا حد غريب عني
بعد أما نسيتني دموع العين
يا حبيبتي يا دنيتي يا ملاكي
دانا دايما فرحتي وياكي
ولو ابعد يوم يبقى هلاكي
عاشقك ولا يمكن هنساكي
وده وعد عليا يا عمري ودين
بقلمي/ خالد جمال ٢٠/٨/٢٠٢٥
ليست هناك تعليقات:
إرسال تعليق