ببعد وبقول مش هرجعله
وإن نادى كتير ولا هسمعله
وإن بان ف عنيه دمعه وزعله
ولا دمع الكون راح يشفعله
وبعادي ده آخره يومين اتنين
والروح ترجعله وتخضعله
ليه تملي معاه بيظلم قلبي
ليه يشك ف اخلاصي وحبي
احترت أنا فيه وغلب غلبي
وبداري عليه حيرتي وتعبي
مانا ذنبي معاه عاشقاه العين
وهعيش وبكفر عن ذنبي
بيلوم على قلبي وأشواقه
ويقول عشرته مُّرُّه وداءُه
ولا فرح ف يوم وياه داقه
واتعصب وأمسك ف خناقه
وخلاص بقى ناوي على طلاقه
بس بحنله وف غمضة عين
ما القط مالوش غير خنّٓاقه
ماعرفشي أسمِّي شعوري ده إيه
ازاي يضايقني وببقي عليه
يبقى المحقوق والروح تراضيه
وإن بات ليله والحزن طاويه
ماتشوفشي عنيا النوم بعديه
ماعرفشي انا عشقي واخدني لفين
بس اللي اعرفه ومصر عليه
أني أنا بعشقه وبدوب ف عنيه
ايوه انا برتاح لما أخضعله
ده حبيبي وقمر الليل ف عنيه
بيشاغل فيا ويحكي عليه
والنجم يلالي ويلمعله
بخضعله
بقلمي/ خالد جمال ١٨/٨/٢٠٢٥
ليست هناك تعليقات:
إرسال تعليق