ببيع جلاليب كل واحد ياجي وياخد اللي على مقاسه
بلاش القصير ياخد الطويلة ويعفص عليها بمداسه
ولا يمشي الناس وراه
في ظهره يعضوا على اسنانهم و يدوسوا له على ذيلها
ولما يدير لهم وشه يضحكوا له ويقولوا
يا سيد الناس جلابيتك عين الله تحرسها طويله بس بتكنس الشارع أحسن ما بيكنسوه ناسه
جلاليب جلاليب ببيع جلاليب
كل واحد ياجي وياخد اللي على مقاسه
بلاش الطويل ياخد القصيرة هتكشف عورته وعيوبه
وكل مين شافه هيسب في أهله وفي ناسه
جلاليب جلاليب ببيع جلاليب
بلاش السمين ياخد الضيقه تزنق كرشه وتصعب عليه أنفاسه
وبلاش النحيف يختار الواسعة علشان يداري بيها عظم صدره ويكذب على الناس ويقول جلابيته ملاها عظم اكتافه
ما أحلى الجلابية على اللي ياخدها والكل يجمع على إنها تفصلت على مقاسه
قالوها كلمه زمان ماسخ وعاجب نفسه يشوف الحلوين يقول حلاوتهم بطمم نفسه
فمش كل من لبس جلابيه يشوف نفسه حلو فيها يمشي ويتمتختر ويقرفنا في الباقي من حياته
أصل الحلاوة إن مكنتش في الطبع و الروح عمر الجلابية ما هتليق على مقاسه
جلاليب جلاليب ببيع جلاليب وببيع معاها مناصب وكراسي
لما تنوي تشتري مني اختار اللي تناسب مقامك
أصل أنا شاطر في بيع الجلاليب والكراسي لكن المقام دا لازم يبقى طبع فيك راسي
ولو حبيت تعليه بلاش تطمع في اللي بناه غيرك وتنسبه لذاتك وتقول العيب على ناسه
أبني مقامك يا غالي بأكتافك وعليه بزين أفعالك ونضف وراك كل أنجاسك
أقعد على الكرسي اللي يسند ظهرك من غير ما يدلدل رجولك أويزيق لما تهز عليه اكتافك
أملى مكانك بمقامك ولو حتى قعدت على راسك
ببيع جلاليب ويمكن لو أهبل أغشك لكنك لو واعي هتختار جلابيه تناسب مقاسك
#بقلمي_م_أ مريم أمين أحمد إبراهيم 🇪🇬
ليست هناك تعليقات:
إرسال تعليق