حين يرتفع الستار عن حقيقة العمر بقلم نشأت البسيوني

حين يرتفع الستار عن حقيقة العمر

بقلم/نشأت البسيوني 

في لحظه غريبة كده ما تعرفش جات منين بتحس إن الستار اللي كان متغطي بيه عمرك بيتشال مره واحده وبتشوف نفسك من برا ومن جوه في نفس الوقت وبتسأل سؤال عمرك ما سألت نفسك بصوته العالي هو انا كنت ماشي ليه بالطريق ده وكنت مستعجل على ايه وليه ضيعت كل السنين دي وانا فاكر إن الدنيا بتستنانا واحنا اللي بنتأخر لكن أول ما الستار يترفع تكتشف إن السنين ما 

بتستناش حد وإن اللي راح ما بيرجعش وإن اللي اتساب اتقفل بابه خلاص وإن كل خطوه مشيتها كانت ثمن لحاجه تانيه انت حتى ما كنتش واخد بالك إنها بتتاخد منك والغريب إنك أول مره تشوف الوجع من بعيد تحس إنه مثبتك وإنك طول السنين دي كنت فاكر إنك قوي علشان مكمل لكن الحقيقه إنك كنت مكمل علشان ما كانش قدامك اختيار تاني وإنك كنت بتهرب من السر اللي عمرك ما 

قلت لنفسك إنك مره تعبت وإنك مره ضعفت وإنك كنت بتحارب على حاجه ما تستاهلش كل الحرب ولما تشوف نفسك من برا تكتشف إنك حبيت ناس غلط وسندت ناس مكنتش تستاهل وسكت على وجع علشان ما تكسرش حد واتكسرت انت وسكت على حاجات علشان تحافظ على شكل الحاجه مش حقيقتها وتنازلت عن اللي يخصك علشان اللي ما يخصكش وفي الآخر لقيت 

إنك اللي كنت بتتاكل مش اللي كنت بتحافظ ومع كل ده تلاقي جواك نور صغير صعب ينطفي نور بيقولك إنك لسه قادر تبدأ من جديد لسه تقدر تعوض نفسك عن نفسك ولسه تقدر تبني من غير خوف وتحب من غير ما تتعلق وتسامح من غير ما ترجع وتبكي من غير ما تهزم وتقوم من غير ما حد يسندك وتعرف إنك يمكن كتير اتألمت بس ولا مره اتكسرت فعلاً وتعرف إن العمر مش بيقاس باللي 

فات ولا بعدد الخسارات ولا بعدد الناس اللي مشيت العمر بيتقاس باللحظه اللي بتقرر فيها تفوق وتحط حد لكل اللي استنزفك وتقول لنفسك من النهارده مش هسمح لحد يعيد نفس الوجع مش هسمح لأيامي تكون نسخه مكرره من اللي فات مش هدي حد أكبر من قيمته ولا هدي قلبي لحد ما يعرفش سعره والحقيقه إن اللحظه دي هي بداية عمرك الحقيقي اللحظه اللي الستار فيها اترفع ورايتك 

أول مره بوضوح من غير تزييف من غير مكابره من غير خوف اللحظه اللي هتبدأ بعدها تعيش لنفسك مش لسيناريو حد كتب لك نهايته