بقلم/نشأت البسيوني
في وقت ما حدش بياخده في الحسبان تلاقي الطريق اللي ماشي فيه وقف فجأه كأنه بيبص لك وبيقولك إنه خلاص مش هيسهلها عليك زي الأول وإن اللي جاي محتاج منك شكل تاني وقلب تاني وروح اتجرحت بما فيه الكفاية علشان تفهم كل حاجه بتحصل حوالينك الطريق له لغة غريبة ما يفهمهاش إلا اللي اتعثر كتير واللي قام كتير واللي اتكسر كتير بس ما وقعش للأبد الطريق بيمتحنك
من غير ورق ومن غير سؤال مباشر بس بسؤال أصعب بكتير هو انت قدك ولا هتسيب اللي جواك يوقعك وتبدأ تشوف حاجات عمرك ما كنت واخد بالك منها تشوف نفسك وسط ناس بتضحك لك من غير ما تكون معاها وتشوف ناس واقفة معاك من غير ما تجامل وتشوف ناس خرجت من حياتك زي ما لو ما كانتش دخلتها أصلاً وتضحك وتقول يمكن الطريق قصد إنه يخفف الحمل من عليك
علشان تكمّل من غير أوزان بتعطلك ومن غير ضهر بتستند عليه غلط ومن غير قلوب تديك شعور بالأمان وهي أصلاً مش أمان
وتكتشف إن الطريق مش قاسي لأنك ضعيف الطريق قاسي لأنه شايف فيك اللي انت نفسك ما شفتهوش شايف إنك تقدر تتحمل وإنك تقدر تقوم وإنك تقدر تواجه ولو إنه بينهشك من كل الاتجاهات بس برضه بيبني فيك حاجه محدش يقدر يكسرها يوم
ما تتمسك بيها الطريق ما بيكبرش حد إلا لما يشوف إنه جاهز إنه يكبر بجد مش بمظاهر ولا بقوة شكلية الطريق بيختار الوقت اللي يعلمك فيه إمتى تحارب وإمتى تهرب وإمتى تسامح وإمتى تقفل الباب وتمشي وتبتدي تفكر في كل اللي عديت بيه كل وجع كان مؤشر إنك على أعتاب مرحله جديدة كل خسارة كانت باب بيتقفل علشان باب أوسع يتفتح كل خذلان كان تنبيه إنك واقف في مكان
مش مكانك كل دمعة كانت بترسم حدودك وتقولك مين يدخل ومين يفضل بره حياتك مهما حصل وتفهم إن اللي اتغير مش الطريق اللي اتغير هو انت انت اللي بقيت شايف أدق التفاصيل انت اللي بقيت أهدى في الرد وأقل اندفاع وأعمق في الإحساس وأصدق في نظرتك للدنيا لأن الطريق ما يعرفش يعلم إلا بالوجع وما يعرفش يفتح وعيك إلا لما يقفل قدامك باب الباب اللي كنت
فاكره الأمان الوحيد وتوصل للحظه اللي تراجع فيها كل شيء وتقول لنفسك إنك ماشي رغم الخوف وإنك واقف رغم التعب وإنك مكمل رغم الأسئلة اللي مالهاش إجابة وإن الطريق مهما اختبرك هيفضل في الآخر يمشيك على قد قوتك مش على قد كسرك لأنه لو كان عايز يكسرك كان عملها من زمان لكنه كان طول الوقت بيجهزك علشان تشوف صورتك الحقيقية مش صورتك اللي كنت متخيلها
وساعتها تعرف إن الطريق ما كانش ضدك الطريق كان بيأهلك علشان توصل مش علشان ترجع وكان بيختبرك علشان يثبت لك إنك مش سهل تكسر وإن اللي واقف جواك أقوى من كل اللي وقع براك
ليست هناك تعليقات:
إرسال تعليق