جماله
راكب طيارة نفّاثة
وحُسنه صاروخ
دلاله
عاوزله مذاكرة ودراسة
بشوفه بدوخ
قُصاده
بلاقي ردودي محتاسة
وابان ملبوخ
عيونه رصاصة قنَّاصة
تصيب في نافوخ
تولّع فيك بميت فازة
وكام شمروخ
رموشها دي زي ألماظه
وبتشرَّخ ف قلبي شروخ
شفايفه كريمه وكريزة
قطع مانجه ودايبة ف خوخ
دي بلطية وكمان طازة
دي رنجايه وفيها بطروخ
ليه عنده يا ناس ماليش عازة
وعندي الروح ثبات ورسوخ
على استعداد أبيع نفسي واترازى
ولو وياه هعيشها ف كوخ
اليها الروح دي منحازة
عشان ف الحسن أستاذة
عيون للعقل أخّاذة
خدود شرباتها ف ازازة
لا انا ببالغ ولا بجامل
ولا امسح جوخ
بجد بجد
حُسنه صاروخ
بقلمي/ خالد جمال ٣١/١/٢٠٢٦
ليست هناك تعليقات:
إرسال تعليق