قالوا عليك ف العشق غضنفر
ابيض يابني بشعر مضفر
مجدول بني يا واد على أصفر
ووشوش الغايرين لونها اصفر
خدك زي ازاز متصنفر
همسك صوت عصفور بيعصفر
سحرك جوه الروح بيحفَّر
قلبي من الأشواق بيفرفر
بس الكود ف هواك متشفر
مابتسمعشي لحد اتطفل
مهما يبسبس ولا يصفر
ورصيدك ف الصبر مصفر
اتمنيت لو بيك كنت اظفر
ده لسان حالها يقولك وفر
تعبك يابني وسعيك أفضل
تمشي وع اللي وراك بتعفر
زي أمير ف العشق مُظفَّر
والباقيين رعاياك مش أكتر
بس انا قلبي قاللي هتقدر
تشغل باله وفيك هيفكر
هنسهره ويبات متحير
أصلي أنا برضو زيه غضنفر
قلت ع الله يا قلبي اتفضل
رحتله شفت عنيه بتواعد
بتقوللي ارحم قلبي يا جاحد
قولتله فين العظمة يا جامد
قاللي خدتها اللهفة وراحت
من يوم شمسك ع الروح لاحت
من يوم عيني بعشقي ما باحت
أصل القلب مالوش غير واحد
لو يلاقيه على طول يتشاهد
يخضع ليه وع الشوق يتعاهد
دانا سطوتي ف وجودك ماتت
لما الروح لغرامك مالت
لما ف حضن هيامك باتت
لما العقل معاك بقى شاتت
هربت مني الجفوة وفاتت
عظمة ايه دانا قلبي مواعد
بقلمي/ خالد جمال ١٩/٥/٢٠٢٦
ليست هناك تعليقات:
إرسال تعليق