إوعى تزعل ع اللي باعوا وع اللي خانوا
واللي نسيوا الود والعِشرة بسهولة
وإوعى تندم لحظة ع اللي في يوم ما صانوا
خد قرار بالإعتزال وبكل رجولة
وإعتبرهم م النهاردة بجد ماتوا
وإعتزل كل اللي فات بذكرياتُه
إعتزالك بدري يعني في حد ذاتُه
هو ده صدّقني أكيد أكبر بطولة
إوعى تزعل ع اللي باعوا وع اللي خانوا
واللي نسيوا الود والعِشرة بسهولة
إوعى تاني في يوم تفكّر في اللي راحوا
يعني إعرف صاحبك وعلّم عليه
وإنسى كل الماضي بعذابُه وجراحه
وم النهاردة بلاش تفكّر تاني فيه
إعتزالك المُبّكر شئ عظيم
ده دليل على إن ربك بيك رحيم
والقرار اللي إنت خدتُه بالبعاد
كان قرار واللهِ صح وفي الصميم
م الضروري لكل فعل رد فعل
وإنت ردك كان حقيقي ضربة قاضية
واللي حاول يعني منك يوم يقل
طِلعوا ناس مالهُمش لازمة وخلق فاضية
كلمة يعني هقولها ليك فعلاً بجد
الحياة مابتنتهيش من بعد حد
واللي كان شايف وجودك جانبُه سُنّة
ف أنت لازم تشوف بعادك عنُه فرض
بقلمي عبدالحميد وهبه
ليست هناك تعليقات:
إرسال تعليق