من غير زعل وبدون كمان أسباب
قررت فجأة أقفل الأبواب
وأي حد يسألني يوم ع الحب
سؤالُه عندي مالوهش أي جواب
فيه ناس كتير طول ليلي ونهاري
عيزاني أرجع تاني في قراري
وأنا صعب أسمح لحد يجبرني
على أي شئ أو يعرف أسراري
واللي يقرّب هبعد بعيد عنُه
مش راح يفيدني القرب يوم منُه
والكل لازم يعرف بقى إنُه
لسة مازال الإعتزال ساري
من بعد جلسة وفترة م التفكير
قررت أدخل حيّز التغيير
وأبعد بعيد بقلبي ومشاعري
وأترك مكاني خلاص بقى للغير
ف ماتزعلوش من غضبي وصراحتي
علشان بحاول أشتري راحتي
وعرفت إن الوحدة دي جنة
و الإعتزال فعلاً في مصلحتي
مين اللي قال م الصعب يعني نتوب
عن حد عِشنا معاه سنين وسنين
في الدنيا شُفنا بجد ياما قلوب
مع بعض لكن يعني مش عايشين
مش كل واحد إحنا عِشنا معاه
يبقى الأمان أو حتى شط نجاه
ممكن نكون عايشين لكن أموات
والبُعد جايز يبقى لينا حياة
بقلمي عبدالحميد وهبه
ليست هناك تعليقات:
إرسال تعليق