سألتني عرفت انا عاشقة منين
قولتلها قالتلي العصفورة
لأ ما تهزرش يا ضي العين
قولتلها بجد يا سنيورة
يوم ما قابلتك شوفتها نوبتين
كت واقفة تغني ومسرورة
شاورتلي بطرف جناح واتنين
وقالتلي حبيبتك مشغولة
قلتلها طب انتي عرفتي منين
فقالتلي البلبلة مسؤولة
رحت لبلبلة قلتلها ده مين
قالك تقوليه للعصفورة
فقالت لي مفيش غير عم وتين
كروان الغابة المسحورة
رحت لكروان وانا كلي حنين
اني اعرف مين شاع القولة
بصلي وعنيه رايحين جايين
مستغرب م اللي بقولهوله
فحايلته عشان يركز ويلين
ورميتله بكفي أنا كام فولة
فجاوبني وقاللي ازاي يا جميل
دي حكايتك قصة ومشهورة
دي طيور الهوى كلها عارفين
راسيين من يومها على الفولة
جاي بتسألني عرفت منين
وسؤالك رده عنيك دولا
يوم ما تكلمت برمش العين
ف حبيبتك وقفت مبهورة
يوم ما اتبسمت غرام وحنين
فاض بينكو الهوى زي نافورة
بعدما قلتلها عرفت منين
بصيتلي وكانت مذهولة
قلتلها خلاص صدقتي آمين
ردت بسؤال ما هي معذورة
هوه احنا ازاي لسانا واقفين
بصت ع السما رسمت صورة
ندهت ع الهوى وقالتله يا زين
طير بينا لحد العصفورة
بقلمي/ خالد جمال ١٦/٨/٢٠٢٦
ليست هناك تعليقات:
إرسال تعليق