وانا ذنبي ايه يا اهل الهوى
بختي ف غرامه يميل
هوه عشان قبلي انكوى
ف بيشفي فيا غليل
ولا عشان م الشوق بكى
بيرده ليا عويل
دانا كنت جاي ليه الدوا
جي اشفي قلب عليل
عطشان سقيته من الهوى
نسي بيا كل الويل
نشفت دموعه اما ارتوى
ودموعي نزلت سيل
قبلي اللي باعه مش انا
ليه شايفني حد بديل
هوه اللي شاف منه الضنا
ورماه ف جرح وويل
كان قلبي لِيه كل المنى
وف عيني شيلته انا شيل
بيخاف عليه لو م الهوى
وعشانه عمره قليل
لو يوم ناداه يلقاه هوا
ومعاه ف همه يشيل
ليه ياخدني ليه بذنب الهوى
وانا روحي ليه بتميل
يجني بايديه الاتنين سوا
على عشق مالو مثيل
وبدال ما جرح يطيب هوا
تبقى الجراح اتنين
ياللي انجرحت من الهوى
وبكيت ف ليله كتير
ماتقولشي دا طبع الهوى
وتعيش لجرحه اسير
وتقول ما هوه اللي ابتدى
ولابد ارد الكيل
بكره اللي خانك يتأذى
ويعيش حياته ذليل
هتلاقي يوم فجرك بدا
لو مهما طال الليل
ومسير جراحك تتنسى
والنوح يصير مواويل
لو الغرام عليك ندا
ماتقولشي سمعي تقيل
لا تضيع حياتك ف الأسى
وتعيش بقلب عليل
بقلمي/ خالد جمال ١٢/٩/٢٠٢٦
ليست هناك تعليقات:
إرسال تعليق