قصيدة عيد ميلادى
ياترى إيه اللى جابك ياعيدميلادى..مش قلتلك ماعدتش تيجى تانى
القطر لسة ماشى .وعدى كام محطة..وانا برضو ف مكانى
وياريتنى كنت أعرف فيه باقى كام محطة ..يمشيها القطر تانى
زى بنك وفيه فلوسى ...والرصيد عمًال بينقص
والغرابة فى كل مرة معرفش سحبت كام..والباقى لسة كام
يبقى أفضفض واقول...كل اللى نفسى أقوله
وانا عندى كلام قليل ..لكن قوى بمفعوله
زمان فى عيد ميلادى ..الشمع كان قليًل..والناس كانت كتيرة
دلوقتى فى عيد ميلادى ..الشمع عمًال بيكتر والناس صبحت قليلة
وانا المذكورة إياااااه...مفيش بيدى حيلة
وتغيظنى يا عيد ميلادى..دايما تيجى ف معادك ولا تخلفش مرة
مع انى كتير بفكر آه لو تنسانى خالص..وتزوغ من برة برة
مالك يا عيد ميلادى ...ماتقوللى إيه اللى صابك
بقى انت بتاع زمان ...ودايما نعمل حسابك
كنت الأول تجينى...تلقانى ف انتظارك
دلوقتى بقيت أتمنى..لو تبعت إعتزارك
وكتير بتدارى منك ..واتمنى متشوفنيش
ألقاك واقف ببابى...تلمحنى وماتسيبنيش
وبعد ماكنت تيجى وعلى وشك سؤال...الناس كتيرة ليه
دلوقتى فى كل مرة تسأل نفس السؤال ..الناس بتقل ليه........!!!
نجوى محمد
8مارس
ليست هناك تعليقات:
إرسال تعليق